WANANCHI WA ROMBO WALAZIMIKA KWENDA KENYA KUFANYA VIBARUA

Wananchi wa kijiji cha Ubetu kata ya Ubetu kahe wilayani Rombo mkoani Kilimanjaro wanalazimika kwenda nchi jirani ya Kenya kufanya vibarua mashambani na biashara ndogondogo ili kuweza kupata fedha za kujikimu kuhudumia familia ikiwemo kulipia watoto ada za shule.

Wakizungumza wakati wa zoezi la kusaidia kaya maskini kupitia mfuko wa maendeleo ya jamii TASAF awamu ya tatu wananchi hao ambao wengi wao ni wananwake wamesema wanalazimika kufanya vibarua ili kupata fedha za kuhudumia familia kupata chakula na kusomesha watoto.

Wamesema wanawake wengi wanalazimika kubeba jukumu la kuhudumia familia kutokana na wanaume kutojishughulisha mara baada ya kunywa pombe na hivyo kukuta familia inashindwa kupata hata mlo mmoja wa chakula.

Mwenyekiti wa kijiji hicho Bw.Damas Tarimo amekiri wananchi wa eneo hilo kukabiliwa na changamoto mbalimbali ambazo zinawalazimu kwenda kutafuta vibarua nchi jirani ya Kenya kutokana na kukabiliwa na uhaba wa chakula ambao umesababishwa na mabadiliko ya tabia nchi.

Kwa upande wake afisa ushauri na ufuatiliaji mfuko wa TASAF wilaya ya Rombo Bw.Jimmy Mongi amesema kutokana na changamoto hizo mfuko huo umeweza kuibua kaya maskini 6834 ambazo zitapatiwa fedha kiasi cha zaidi ya shilingi milioni 238 kwaajili ya kuanzisha miradi midogomidogo ya kiuchumi ambayo itawawezesha kujikwamua na umaskini.