 |
Waziri Kivuli wa Fedha na Uchumi, James Mbatia
|
KAMBI Rasmi ya Upinzani Bungeni kupitia kwa
Waziri Kivuli wa Fedha na Uchumi, James Mbatia, imesoma bajeti mbadala wa ile
iliyowasilishwa na Serikali, huku ikiainisha masuala kadhaa ya kukuza uchumi na
kupunguza utegemezi...Anaandika Mwandishi Wetu .
Kwa mujibu wa Mbatia aliye Mbunge wa
Kuteuliwa na Mwenyekiti wa Taifa wa NCCR-Mageuzi, katika kipindi cha miezi
minne ijayo kuanzia sasa, Serikali ya CCM ianze kujiandaa kisaikolojia kuondoka
madarakani na kupiisha kwa amani serikali adilifu itakayoongozwa na UKAWA
kuingia madarakani ili waweze kuwatumikia Watanzania.
Akiwasilisha maoni ya upinzani leo kwa Bajeti
ya 2015/16, Mbatia amesema “tunapendekeza kukusanya Sh. bilioni 19,695.2 ambapo
mapato ya kodi na yasiyo ya kodi Sh. bilioni 18,847.1 (sawa na asilimia 20) ya
Pato la Taifa.
Aidha, mapato ya halmashauri ni asilimia 0.9
ya pato la Taifa sawa na Sh. bilioni 848.1.
Amesema hiyo ni bajeti isiyo na mikopo ya
kibiashara, hivyo inalenga kulipunguzia taifa mzigo wa madeni, tofauti na ile
ya serikali yenye mikopo ya masharti ya kibiashara ya 10% na hivyo kuwaongezea
wananchi mzigo wa madeni.
“Bajeti inayoendelea kusisitiza umuhimu wa
kuwalipa pensheni wazee wote nchini wenye umri wa miaka 60 na kuendelea wakati
ile ya serikali iko kimya kabisa kuhusu malipo ya pensheni kwa wazee wote
nchini, kwani bado inaendelea kufanya upembuzi yakinifu usioisha,”amesema.
Mbatia ameongeza kuwa bajeti yao inaendelea
kusisitiza kushusha kiwango cha tozo ya kodi ya mapato ya ajira kwa wafanyakazi
(PAYE) hadi kufikia asilimia 9 badala ya 11 ya serikali inayokandamiza
wafanyakazi.
Kuhusu vyanzo vipya vya mapato ya ndani,
upinzani umeainisha na hivyo kuonesha kuwa ni nchi inayojitegemea kwa asilimia
89.5 wakati ya serikali ni tegemezi kwa asilimia 10.32 kutokana na kukopa kwa
kiwango kikubwa na hivyo kuongeza deni la taifa.
Mapato ya ndani ya kodi na yasiyo ya kodi,
Mbatia anasema yatakuwa asilimia 20 ya pato la Taifa kinyume na serikali yenye
mapato ya ndani ya kodi na yasiyo ya kodi asilimia 14.3 ya pato la Taifa.
“Bajeti yetu inalenga kupunguza misamaha ya
Kodi hadi kufikia asilimia 1 ya Pato la Taifa ili kuongeza mapato ya ndani
wakati serikali imetaja tu azma ya kupunguza misamaha ya kodi bila kufafanua
kwa undani.
“Tunalenga kutekeleza kikamilifu miradi ya
maendeleo kwa kutenga asilimia 27.34 ya bajeti yote kugharamia miradi ya
maendeleo. Bila kukopa katika mabenki ya ndani wakati asilimia 26.31 ya bajeti
ya serikali ni matumizi ya maendeleo. Hii ni pamoja na kukopa kibiashara katika
mabenki ya ndani,” amesema.
Mbatia ameongeza kuwa, bajeti yao inalenga
kukusanya mapato kutoka kwenye vyanzo ambavyo havimuumizi mwananchi wa kawaida
tofauti na serikali inayolenga kukusanya mapato kutoka katika bidhaa
zinazotumiwa kila siku na wananchi hivyo kuongeza ugumu wa maisha.
Anasema “matumizi ya kawaida yatakuwa ni
asilimia 72.66 ya bajeti yote baada ya kutenga fedha za wazee na kuongeza
mishahara kwa 10% huku ile ya serikali matumizi ya kawaida ni 73.69.”
Kwa mujibu wa Mbatia, bajti yao ni ya
kumsaidia mwananchi wa kawaida kutoka katika wimbi la umaskini, tofauti na ile
ya serikali ya CCM aliyosema haimtambui mwananchi maskini na kuongeza matumizi
makubwa kwa watawala.
Kuhusu ongezeko la bei ya mafuta, Mbatia
amesema, “ni suala mtambuka litakasababisha mfumuko mkubwa wa bei na hatimaye
kuongeza uchungu na ugumu wa maisha ya Mtanzania kwa sababu bei za usafiri na
bidhaa za mazao zinazosafirishwa kutoka eneo moja kwenda eneo jingine pia
zitapanda
Habari hii imeandaliwa kwa hisani ya
Mwanahalisi oline
Hakuna maoni:
Chapisha Maoni