MKUU WA HARAKATI YA BIAFRA NIGERIA ANYIMWA DHAMANA

Mahakama moja nchini Nigeria imepinga ombi la kuachiliwa huru kwa dhamana mkuu wa harakati ya Biafra inayopigania kujitenga na Nigeria.

Mtandao wa habari wa Africa Time umeripoti habari hiyo na kusema kuwa, mahakama moja nchini humo imekataa ombi la kuachiliwa huru kwa dhamana Nnamdi Kanu, mkuu wa harakati ya kupigania kujitenga na Nigeria eneo la Biafra la kusini mwa nchi hiyo pamoja na watuhumiwa wengine wawili wanaokabiliwa na tuhuma za usaliti na imetoa amri ya watuhumiwa hao kubakia korokoroni hadi kesi yao itakaposikilizwa tena tarehe 9 mwezi huu wa Februari.

Jaji John Tsoho wa mahakama ya fiderali ya mjini Abuja, ametoa hukumu hiyo na kusisitiza kuwa, watuhumiwa hao hawapaswi kuachiliwa huru hata kwa dhamana.

Jaji huyo ameongeza kuwa, kuachiliwa huru kwa dhamana watuhumiwa hao kutaharibu uchunguzi unaoendelea kuhusu tuhuma zinazowakabili. Pia amesema, mkuu wa harakati ya kujitenga Biafra na Nigeria huenda akatoroka nchi na asishiriki tena kwenye vikao vya kusikiliza kesi yake kutokana na kuwa na uraia wa nchi mbili za Nigeria na Uingereza.

Itakumbukwa kuwa jimbo la Biafra la kusini mwa Nigeria limeshuhudia vita vibaya sana vya wenyewe kwa wenyewe kwa karibu nusu karne.