CUF YAKUBALI KURUDI KATIKA MAZUNGUMZO ZNZ LAKINI…

Chama cha Wananchi CUF cha nchini Tanzania kimekubali kurudi kwenye mazungumzo ya kuutafutia ufumbuzi wa amani mkwamo wa kisiasa visiwani Zanzibar, kwa sharti kwamba, mchakato wa uchaguzi wa marudio usimamishwe.

Hayo yamesemwa na Katibu Mkuu wa chama hicho Maalimu Seif Shariff Hamad mbele ya waandishi wa habari jijini Dar es Salaam jana. Maalim Seif ametoa msimamo huo wa CUF baada ya baada ya kukutana na waziri mkuu mstaafu wa Tanzania Edward Lowassa ambaye pia alikuwa mgombea wa urais wa Tanzania wa chama cha CHADEMA chini ya mwavuli wa Umoja wa Katiba ya Wananchi UKAWA kwenye uchaguzi mkuu wa Oktoba 25 mwaka jana. Aidha Maalim Seif ambaye pia ni Makamu wa Kwanza ya Rais wa Zanzibar amekitoa hofu cha tawala cha CCM na kusema kuwa, haoni sababu ya chama hicho kuhofia CUF kuchukua madaraka ya serikali ya Umoja wa Kitaifa visiwani Zanzibar. Alisema chama chake hakina ajenda ya kulipiza kisasi. Itakumbukwa kuwa, matokeo ya uchaguzi wa Rais wa Zanzibar, wawakilishi na madiwani yalifutwa na Mwenyekiti wa Tume ya Uchaguzi Zanzibar (ZEC), Jecha Salum Jecha siku ambayo tume hiyo ilitakiwa kumtangaza mshindi, na mwezi uliopita wa Januari, mwenyekiti huyo wa ZEC alitangaza Machi 20 kuwa siku ya uchaguzi wa marudio visiwani humo.